بالصور فطيرة الصينية التحفة (بنت الصحن)

اسمها عندنا فى مصر فطيرة الصينيه ومشهورة اكتر فى الصعيد 
بس مع اختلافات بسيطة وهى انها بدون حبة البركة وبتكون بالشربات بدل العسل

ولقيت وصفات على اليوتيوب لمنال العالم وشيف اسامة ووصفات لبنات الخليج وتقريبا المكونات واحده

واخترت الطريقه دى والحمد لله نجحت جدا وكانت سهله 
والاهم انها عجبت جوزى ولانه مش من محبى الحلويات اتبسطت جدا الحمد لله وبقا بيطلبها منى اكتر صنف

نشوف الصورة النهائيه ليها كنت عاملاها فى شهر رمضان المعظم 
ونرجع نشوف الصور والطريقه من البداية

الصورة هنا من موقع منال العالم شوفوا بتاعتى اجمل ازاى 

• 

وهنا مع كيرلى سينابون عملته من بواقى العجينه 

المكونات :
2و1/2 كوب دقيق ابيض +رشة ملح +1م ص خميرة فوريه
1بيضه كبيرة +فانيليا +ماء دافئ للعجن +1/2 كوب سمنة مذاب

(مكسرات حسب الرغبه ودى اضافه من عندى )

ينخل الدقيق ويضاف الملح والخميرة والبيضه والفانليا 
(انا باستعمل فانيليا سوداء)ويضاف الماء الدافئ بالتدريج مع استمرار العجن 
يضاف ربع كوب من السمنه ويعجن جيدا (والربع الاخر نحطة بين الطبقات بعدين) 
قد تحتاج لدقيق اكتر حسب العجن المهم ان تكون العجينه طريه ومتماسكة 
تترك لترتاح ربع ساعه مع دهنها بالسمنه وتغطيتها 

تعجن مرة اخرى بعد ذلك وتقطع الى 12 كورة متساويه او 16

تفرد اول كرة على دقيق او سمنه 
انا فردت الاولى على الدقيق بس كانت سميكة نوعا ما 
عملت الباقى على سمنه مذابه زى الفطير كانت هايله الحمد لله 
والفرق واضح فى الصورتين !!

وباقطع الاطراف بحيث تكون الفطيرة مدورة على قد حجم الصينيه
ونحتفظ بالزيادات على جنب هنعمل منهم كيرلى 

تدهن صينيه بالسمنة و نضع اول فطيرة وترش بالسمنه وانا اضفت من عندى المكسرات المفرومة وسمسم وجوز هند 

نكمل بنفس الطريقه بين كل طبقه واخرى رشة خفيفه من السمنة زى الجلاش ..والمكسرات على حسب الرغبه 
وممكن نرش السمنه وقطع من الجبنه بين الطبقات 

ماعدا اخر طبقه تدهن بصفار بيضه وفانليا او بيضه كامله وفانليا
ويرش الوجه بحبة البركة وده اساسي ونسيبها تخمر ربع ساعه

تدخل الفرن الساخن مسبقا فى البدايه ربع ساعه ونهدى النار لمدة ساعه عشان الطبقات تستوى من جوا لانهم 12 طبقه 
(على حسب فرن كل واحده ممكن اقل )

بعد النضج والاحمرار ..رفعت الطبقات بسكينه لقيتها استوت الحمد لله 

المفروض نسقيها بعسل نحل بس انا مش باحب(احبووووووش)
الحلو تقيل .. 
فعملت شربات متوسط الكثافه: ويكون بارد 
2كوب ماء و2 كوب سكر ومعلقه ليمون وفانيلا
ونسقيها وهى سخنه ونغطيها شويه عشان تتشرب 

يا جمالها بعد التقطيع 

من جوا وووواااااوووووووو ودايبه وجميله 

فاصل ونواصل ان شاء الله مع باقى الصور 
وطريقة كيرلى سينابون

نكمـــــــل

بواقى العجينه من كل فطيرة 
يعنى الاطراف الخارجيه الزياده بنجمعهم كلهم ونعجنهم تانى مع بعض 
ونفردهم على رشة دقيق وفوقها دقيق خفيف ونفرد 
ندهن العجينه بالزبده او السمنه من فوق وعليها معلقه كبيرة قرفه بودرة ونقطع بالسكينه او القطاعه شرائط طوليه
(على فكرة ممكن تعمليها من اى عجينه )
غالبا باعملها من باقى عجينة السينابون او 10 دقايق

نلف كل شريط على عود خشبى من الطرف ونكمل بشكل حلزونى مائل ونضغط النهايه عشان تقفل

ونسيبها تخمر ربع ساعه وبعدين نقليها فى زيت غزير على نار متوسطة او هاديه 

تنشل من الزيت على مناديل مطبخ وترش بالسكر البودرة 
وممكن صوص شوكولاته او حليب مكثف 

وهنا الصور النهائيه ل بنت الصحن 

شايفين الطبقات رقيقه زى البقلاوة وطريه فى نفس الوقت 
ومكوناتها سهله وبسيطة

وفى النهايه اتمنى تكون الوصفه عجبتكم وافادتكم 
source: http://forums.fatakat.com/thread3307016