فراخ بالخلطة المكسيكية + فطيرة اللحمة المفرومة

النهارده هنعمل مع بعض فراخ بالخلطة المكسيكية، وجبة سهلة وخفيفة ومش هتاخد منك وقت، وممكن تقدميها مع الرز.
فراخ بالخلطة المكسيكية
المقادير:
فرخة
2 ثمرة فلفل أخضر مقطع لقطع صغيرة
2 ثمرة فلفل أحمر مقطع لقطع صغيرة
2 ثمرة طماطم مقطعة شرائح
بصلة مقطعة لقطع صغيرة
2 كوب شوربة فراخ
ملعقة صغيرة توابل
2 فص ثوم مفروم
كوب كريمة خفق
ملح وفلفل أسود
2 كوب ميه
شطة

الطريقة:
1- حطي الفرخة في حلة على النار وضيفي عليها كل المكونات السابقة وغطيها وسيبيها على النار لمدة ساعة لحد ما الخليط يغلي، وبعد كده اقلبي الفرخة على الناحية التانية وسيبيها لمدة 30 دقيقة.

2- شيلي الفرخة من الخليط وسيبيها على جنب تبرد، وبعدين قطعيها وشيلي العظم منها، وبعد كده حطي قطع الفراخ في الخليط وسيبيه على النار لمدة 10 دقائق مع التقليب، وقدميها.. وبالهنا والشفا.

أكلة جديدة بمكوّنات بسيطة وطريقة سهلة ليكي ولأسرتك، وممكن تقدّميها كوجبة غداء.

فطيرة اللحمة المفرومة
المقادير:
½ كيلو لحمة مفرومة
علبة ذرة (اختياري)
1/ 8 كيلو جبنة شيدر مبشورة
1/ 8 كيلو جبنة رومي مبشورة
2 كوب فلفل أخضر مقطع
½ ملعقة صغيرة توابل
ملعقة صغيرة بابريكا
ملعقة صغيرة ملح
½ كيلو بقسماط
2/ 3 كوب لبن
علبة صلصة
2 بيضة

الطريقة:

1- سوّي اللحمة على النار، وضيفي عليها الفلفل الأخضر والملح وصلصة الطماطم وقلّبيهم مع بعض كويس، وبعد كده ضيفي عليهم التوابل والبابريكا وقلّبيهم مع بعض، وسيبيهم على نار هادية من 10 : 15 دقيقة.

2- اخلطي البقسماط مع البيض واللبن لحد ما يتجانس الخليط، وبعد كده افردي نصف الخليط في الصينية، وبعدين ضيفي عليه الذرة، وبعد كده افردي عليه نصف كمية الجبنة الشيدر والجبنة الرومي، وافردي عليهم خليط اللحمة.

3- اخلطي باقي الجبنة الرومي والشيدر مع باقي خليط البقسماط، وقلّبيهم مع بعض كويس، وبعدين افردي الخليط ده كطبقة أخيرة وحطّيه في الفرن لمدة ساعة، وبعد كده قدّميها.. وبالهنا والشفا.