بالصور ديك رومي محشي بالخضروات

طريقة عمل الديك الرومي المحشي بالخضراوات، علشان سفرتك فى رأس السنة تبقى مميزة وشهية..


ديك رومي محشي بالخضراوات
المقادير:
ديك رومي (وزنه من 8 : 10 كيلو)
ملعقة كبيرة قشر ليمون مبشور
2 ثمرة بصل كبيرة مقطّعة مكعبات
2 ثمرة جزر كبيرة مقطّعة مكعبات
½ كوب مكعبات زبدة طرية
3 عيدان روزماري ناشف
ملعقة كبيرة بهارات فراخ
ملعقة صغيرة مريمية
ملعقة صغيرة زنجبيل
ملعقة صغيرة قرفة
ملح وفلفل أسود
حزمة كرفس

الطريقة:
1- قطّعي الكرفس قطع كبيرة شوية، واخلطيه مع البصل والجزر وتبّلي الخليط ده بملعقتين كبار ملح وملعقة كبيرة فلفل أسود وملعقة كبيرة بهارات الفراخ.

2- هاتي الديك الرومي بعد ما تغسليه وتنظفيه كويس، وتبّليه من جوة بالملح والفلفل والروزماري والمريمية، وكمية مناسبة من خليط الخضراوت اللي عملتيه، ماتنسيش تحشي منطقة الرقبة كمان.

3- اربطي أرجل الديك الرومي ببعضها باستخدام الخيط الطبي أو أي خيط عندك، وثبّتي الجناحين في الصدر باستخدام خلة الأسنان.

4- اعجني الزبدة الطرية اللي عندك بأي توابل تحبّيها زي الملح والزعتر والمريمية والزنجبيل والبابريكا، وبعد كده نشّفي الديك الرومي من برة بفوطة نظيفة، خدي خليط الزبدة والتوابل وادهني به الديك من برة، وكمان امسحي المنطقة ما بين جلد ولحم الديك بالخلطة دي.

5- هاتي الصينية اللي هتسوّي فيها الديك، وحطي فيها باقي الخضراوات، وضيفي معاه نصف كوب ميّة أو شوربة، وبعد كده هاتي ورقة فويل تكفي إنك تغطّي بها صدر الديك الرومي، من غير ما تضغطي عليه جامد علشان ما يلتصقش بالزبدة الموجودة على جلد الديك الرومي.

6- دخّلي الصينية في فرن ساخن، وسيبيه يستوي في درجة حرارة متوسطة لمدة 4 ساعات، وماتنسيش تشيلي ورق الفويل بعد 3 ساعات، علشان الديك الرومي يتحمرّ كويس، وبعد ما تشيلي الفويل، اسقي الديك الرومي بالمرقة بتاعته من وقت للتاني علشان لحم الديك يتشبّع بالمرقة ويبقى طري وطعمه أحلى.

7- بعد ما تطلعي الديك الرومي من الفرن غطّيه بالفويل، وسيبيه يهدا لمدة 20 دقيقة، وفي الوقت ده هاتي الطبق اللي هتقدّميه فيه وزيّنيه بالطريقة اللي تعجبك، وبعد كده حطّي الخضار اللي سويّتيه مع الديك الرومي، وفي الآخر خالص حطّي الديك الرومي.. وبالهنا والشفا.