5 طرق بسيطة لنظافة أكيدة من البقع العنيدة

أكتر حاجة ممكن تضايق أي حد هي بقعة ظاهرة على الملابس الجديدة، أو على سجادة غالية..

النهارده هنقول لك على 5 حاجات ممكن تكوني بتستخدميها في حياتك اليومية، تقدر تخلّصك من البقع العنيدة بكل بساطة..

الملح للتخلص من بقع العرق

1- الملح للتخلص من بقع العرق
اللون الأصفر المحرج اللي بيسبّبه العرق على بلوزة فاتحة ممكن تتخلصي منه بإنك تدوّبي 4 ملاعق من الملح في لتر ميه سخنة، وبعد كده حطّي البلوزة أو أي حاجة عايزة تنضّفيها في الميه دي وادعكي مكان البقعة كويس لغاية ما البقعة تروح خالص.

2- معجون الأسنان لبقع الحبر وأحمر الشفاه
بقع الحبر على القماش من أصعب البقع اللي ممكن تقابليها، وغالبا بيكون مصير قطعة الملابس اللي بتتبقع بالحبر إنها تترمي، علشان كده مفيش مشكلة إنك تجرّبي طريقة معجون الأسنان قبل ما تقرري إنك ترمي القطعة اللي عليها البقعة، لأن مش مؤكد إن الطريقة دي هتجيب نتيجة، ده بيعتمد على حسب نوع القماش والحبر.

عموما كل اللي عليكي إنك تغطّي مكان البقعة بمعجون الأسنان الأبيض العادي (مش جل)، وبعد كده ادعكي مكان البقعة كويس، ولو حسّيتي إن الحبر بيطلع معاكي كرّري الخطوة أكتر من مرة لغاية ما تحسّي إن مكان البقعة بقى نضيف تماما، والطريقة دي بتجيب نتيجة هايلة مع بقع أحمر الشفاه.

سيبي النشادر على البقعة دقائق قبل ما تغسليها

3- محلول النشادر سلاح فعّال مع البقع الصعبة
النشادر من الحاجات اللي بتستخدم في التخلّص من أشكال كتيرة ومختلفة من البقع، ومنها:
- بقع الدم: تخلّصي منها بإنك تبللي مكان البقعة بميه مضاف إليها قطرات من محلول النشادر وتسيبيها شوية، وبعد كده اغسليها بالطريقة العادية.

- بقع القلم الجاف: تقدري تنضّفيها بإنك تضيفي قطرات من محلول النشادر من غير ما تخفّفيه أو تدوّبيه بميه، وتسيبيه على مكان البقعة لمدة من 2 : 3 دقائق، وبعد كده ادعكيها كويس، ولو البقعة كانت لسه موجودة ممكن تحطّي عليها أي مسحوق غسيل وتدعكيها مرة تانية، وبعد كده اشطفيها كويس.

- بقعة اللبن: ممكن تدعكي مكان البقعة بخليط من الميه والملح ومحلول النشادر، وبعد كده اشطفي مكان البقعة، واغسلي قطعة الملابس بطريقتك العادية بعد كده.

الطباشير بيمتص الدهون من القماش

4- الطباشير لبقع الزيت والشحم
افركي قطعة الطباشير على مكان البقعة سواء كانت على قطعة ملابس أو مفرش السفرة، وسيبي الطباشير يمتص الزيت من الأنسجة قبل ما تفركيه بإيدك، ولو حسّيتي إن البقعة لسه موجودة كرّري نفس الخطوة مرة تانية قبل ما تغسليه.

تقدري كمان تستخدمي الطباشير بنفس الطريقة في التخلّص من البقع الصفراء اللي بتبقى موجودة على ياقات القمصان بسبب العرق.

5- زيت الأطفال لأحذية لامعة 
تقدري تخلّي حذائك القديم بيلمع كإنه جديد في كل مرة بتلبسيه فيها، بإنك تمسحيه بقطعة قماش ناعمة مضاف إليها قطرات قليلة من أي نوع من زيوت الأطفال، وتقدري تعملي نفس الطريقة دي مع الشنط الجلد، بس ما تنسيش إنك تنشّفي الجلد من الزيت بعد ما تلمعيه باستخدام قطعة قماش نظيفة.