بالخطوات المصورة طريقة عمل الكرواسون بالمنزل

قدّمي لزوجك و لابنك كرواسون صحي ولذيذ

هاتي زبدة طرية وقطّعيها مكعبات

افردي الزبدة بالنشابة

اضغطي عليها كويس علشان تتماسك

اعمليها على شكل مربع

حطّي الزبدة على العجينة

اقفلي العجينة على الزبدة من كل الجوانب..وتدخليها التلاجة مدة نص ساعه ممكن تكررى العملية دى 3 مرات

قطّعي العجينة على شكل مثلثات

لفي العجينة من عند قاعدة المثلث

ادهني الكرواسون بالبيض واللبن ودخّليه الفرن

كرواسون محشي بالجبنة والشيكولاتة
المقادير:

• 4 كوب دقيق (بس اعملي حسابك في كمية دقيق أكبر لفرد العجينة بالنشّابة)
• 1 و¼ كوب زبدة طرية مقطّعة مكعبات
• ملعقة كبيرة خميرة جافة فورية
• ملعقة صغيرة ملح
• ¼ كوب سكر
• ½ كوب ميه
• ½ كوب لبن

للحشو والتلميع:
شيكولاتة خام مقطّعة مكعبات أو أي نوع شيكولاتة تحبّيه
بيضة + ½ كوب لبن لدَهن الكرواسون
جبنة رومي أو شيدر

الطريقة:
1- في طبق غويط اخلطي الدقيق مع الملح والسكر والميه والخميرة، واعجنيهم مع بعض بإيدك لمدة 15 دقيقة تقريبا لغاية ما العجينة تبقى طرية ولينة في إيدك وفيها مرونة، وبعد كده افرديها على شكل مستطيل، وشيليها في صينية في الثلاجة طول الليل علشان تتخمّر كويس.

2- هاتي مكعبات الزبدة وادمجيها مع بعضها بالنشّابة، وافرديها كويس بحيث يبقى سمكها رفيع وتعمل شكل مربع، وغلّفيها في ورق الزبدة وشيليها في الثلاجة شوية علشان تبقى متماسكة بس راعي إنها تفضل طرية.

3- طلّعي العجينة من التلاجة بعد ما سيبتيها طول الليل، وحطّيها على أي سطح مستوي عندك في المطبخ بعد ما ترشّيه بشوية دقيق، وافردي عليه العجينة بالنشّابة، واعمليها على شكل مستطيل يكون أكبر من طول وعرض قطعة الزبدة اللي عملتيها.

4- حطّي الزبدة في منتصف العجينة، واقفلي عليها العجينة من كل الأطراف، وبعد كده رشي كمية تانية من الدقيق، وافردي العجينة مرة تانية بالنشابة على شكل متسطيل.

5- بعد كده، طبّقي العجين 3 طبقات فوق بعضه، وافرديه بالنشّابة مرة تانية على شكل مستطيل، بعد ما ترشّي طبقة خفيفة من الدقيق مرة تانية.

6- كرّري نفس الطريقة مرتين، وفي المرة الأخيرة افردي العجينة على شكل مستطيل كبير، وابدئي في تقطيعه من المنتصف إلى مستطيلين بالطول.

7- المستطيل الأول قطّعيه على شكل مثلثات زي اللي بتعمليها مع البيتزا، والمثلث التاني قطّعيه على شكل مستطيلات صغيرة.

8- هاتي قطع العجين اللي على شكل مثلثات، ومطّيها شوية بإيدك علشان تبقى أطول، واحشيها من عند القاعدة العريضة بقطعة جبنة صغيرة، وابدئي ابرميها إلى الأمام علشان تديكي شكل الكرواسون الملفوف، وبعد كده اتنيه من عند الجوانب الرفيعة.

9- أما قطع العجين اللي على شكل مستطيلات، احشيها بقطع الشيكولاتة الصغيرة، واقفلي العجينة عليها من كل الجوانب.

10- رصّي الكرواسون المحشي بالجبنة في صينية والكرواسون المحشي بالشيكولاتة في صينية تانية، وبعد كده غطّي الصواني دي بقطعة قماش نضيفة أو سيلوفان، وسيبيها على جنب لمدة ساعتين أو تلاتة؛ علشان تتخمّر وحجم العجينة يتضاعف.

11- بعد كده ادهني قطع الكرواسون بخليط مكوّن من نصف كوب لبن وبيضة، بس راعي إنك تعملي الخطوة دي بالراحة من غير ما تضغطي على العجينة علشان ما تتفردش وتخرّجي الهوا من جواها.

12- بعد كده دخّلي الصواني في فرن ساخن على درجة حرارة 200 لمدة 10 دقايق أو لغاية ما وش الكرواسون يبقى لونه دهبي، وبعد كده طلّعيه.. وبالهنا والشفا.