دوناتس بالسكر البودرة والشيكولاتة

النهارده هنعمل مع بعض الدونتس، لكل أم عايزة تعمل لطفلها حلويات لذيذة ومفيدة في نفس الوقت، تابعينا وابعتي قولي لنا رأيك...

دونتس 
مقادير العجينة:
4 كوب دقيق
كوب ماء دافئ
ملعقة كبيرة ملح
ملعقة كبيرة خميرة
2 ملعقة كبيرة سكر
½ ملعقة صغيرة فانيليا
½ ملعقة كبيرة بيكينج باودر
½ كوب زبدة
¼ كوب لبن
زيت للقلي
3 بيضات

للتزيين:
½ كوب سكر بودرة
½ كوب قرفة مطحونة
½ كوب شيكولاتة مبشورة

الطريقة:
1- دوّبي الخميرة في الميه الدافية مع ملعقة كبيرة من السكر، وسيبيها لمدة 5 دقائق علشان تخمر.

2- اخلطي الدقيق مع ملعقة السكر الباقية والبيكينج باودر والملح.

3- ضيفي باقي المقادير الموجودة عندك للخليط السابق واعجنيهم مع بعض لمدة 10 دقائق، وبعد كده ضيفي الخميرة، واستمري في العجن لمدة ربع ساعة علشان كل المقادير تتخلط مع بعضها كويس.

4- حطّي العجينة في صينية مدهونة بشوية زيت، وغطّيها بفوطة لمدة ساعة علشان تخمر وحجمها يزيد.

5- رشّي رخامة المطبخ بالدقيق، وافردي العجينة عليها بسُمك 2 سم، وقطّعيها باستخدام كوباية كبيرة على شكل دوائر، وقطّعي كل دائرة إلى دائرة أصغر باستخدام كوباية أصغر.

6- سيبي العجينة لمدة ربع ساعة علشان ترتاح، وبعد كده حمّريها في الزيت لغاية لونها ما يبقى دهبي، وارفعيها على مناديل ورق علشان تتشرّب أي زيت موجود فيها.

7- زيّني الدونتس بالسكر البودرة أو بالشيكولاتة أو المربى، وبألف هنا وشفا.

وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..