أصابع الجلاش بالجبنة

النهارده هنعمل مع بعض طبق جديد وسريع جدا؛ علشان تزيّني به سفرتك، وتجرّبيه جنب أكلاتك الشهية، وماتنسيش تبعتي لنا رأيك فيه، وتقولي لنا على أي أكلة عايزة تعرفي طريقتها..

أصابع الجلاش بالجبنة
المقادير:
½ كيلو جلاش
½ كيلو جبنة بيضاء "أي نوع "
½ كوب نعناع أخضر مفروم
½ كوب بقدونس مفروم
بصلة مفرومة
ملح وفلفل
زبدة

الطريقة:
1- حمّري البصل المفروم في الزبدة، وضيفي عليهم النعناع والبقدونس المفروم والملح والفلفل، وبعد كده ارفعيهم من على النار، وضيفي عليهم الجبنة، واخلطيهم مع بعض كويس.

2- قطّعي الجلاش مستطيلات، واحشيه بخليط الجبنة، ولفّيه كل مستطيل على شكل أسطواني.

3- حطّي أصابع الجلاش في صينية مدهونة بالزبدة، ودخّليها الفرن لحد ما تحمرّ، وبعد كده طلّعيها وقدّميها، وممكن كمان تعملي معاها كباب حلة.. وبالهنا والشفا.