كيكة الشيكولاتة بصوص الشيكولاتة..بيتى وبالصور

بصو صدقوني هتدعولي لو جربتوها

انا مش هتكلم كتير انا هدخل على الطريقة على طول

أول حاجة افتحي الفرن على درجة متوسطة

تدهني صنيتك سمنة او زيت وتبطنيها دقيق

ونيجي بقى للشغل المهم

تجيبي الخلاط بتاعك
وتحطي فيه

كوباية زيت
كوباية سكر
كوباية لبن (او كيس لبن نيدو بجنيه ومعاه كوباية ميه)
أربع معالق كبار كاكاو بودرة

واضربي يا أختي



هاتي بقى كوبايتك الحلوة وخدي من الخلاط واملي الكوباية

وده يا قمراية الصوص
حطيه في التلاجة




الباقي اللي في الخلاط اكسري عليه بيضة حلوة وشوية فانيليا واضربي

تكوني ناخلة كوباية دقيق حلوة وكيس بيكنج بودر

وتحطي عليه الخليط اللي في الخلاط وبالمضرب السلك واضربي بالراحة

تصبي بقى في الصينية بالراحة

هتبقى كده



وتدخليها الفرن وتسيبها على الاقل نصاية ومتفتحيش عليها الفرن خااااالص الا لما تحسي انها استوت

وهتبقى كده




طلعيها من الصينية على ضهرها علشان تكون مستوية مش مايلة وادهنيها بقى كده زي الشاطورة من الصوص بتاعنا اللي حطيناه في التلاجة




وسيبه في التلاجة شوية في الرف اللي تحت الفريزر

وطلعيها وبالهنا والشفا

متنسوش تدعولي بالذرية الصالحة والتقييم بقى يا قمرات

وميرسي جدا لكل واحدة هترد عليا وخصوصا بقى لو عجبكو الموضوع