موس الكراميل بطريقة سهلة وسريعة

موس الكراميل

المقادير:
4 كوب لبن
كوب كريمة خفق
2 كيس كريم كراميل (هتلاقيه في السوبر ماركت)
باكو بسكويت بالزبدة (أي نوع)
شيكولاتة مبشورة (للتزيين)

مقادير الكراميل:
¾ كوب سكر
¼ كوب ماء

الطريقة:
1- لصنع الكراميل؛ حطّي السكر مع الماء وقلّبيهم على نار هادية، لحد ما يدوب السكر تماما ويبقى لونه بني غامق.

 2- اخلطي الكريم كراميل مع اللبن، وقلّبيهم مع بعض على البارد شوية، وبعد كده ارفعيهم على نار هادية، وضيفي عليهم الكريمة، واستمري في تقليبهم لغاية ما تظهر بعض الرغاوي الصغيرة على السطح.

3- ضيفي الكراميل على الخليط السابق على النار، وقلّبيهم مع بعض لمدة د دقايق، وبعدين ارفعيهم من على النار.

4- في كاسات التقديم كسّري البسكويت قطع صغيرة جدا، وضيفي عليه الخليط اللي عملتيه، وحطّيه في التلاجة، وعند التقديم زيّني الكاسات بالشيكولاتة المبشورة.. بالهنا والشفا.

أفكار بسيطة حتى يحب طفلك اللبن

المشكلة الأزلية لمعظم الأمهات أن أطفالهم بيكرهوا طعم اللبن، وبيرفضوا يشربوه، وفي حالة زي دي صعب جدا الأم توافق طفلها على رغبته؛ لأن اللبن مهم جدا لجسمه ولسلامة نموه.. طيب إيه العمل؟

النهارده هنقترح عليكي شوية أفكار ممكن تقدّمي بيها اللبن لطفلك بشكل مختلف، علشان يشربه من غير مشاكل:

قدمي لطفلك لبن بالفواكه بدل اللبن في صورته الخام

لبن بالفواكه
الأطفال بيرفضوا شرب اللبن عادة لما بتقدّميه بصورته الخام، جرّبي تخلطي اللبن مع نوع الفاكهة اللي طفلك بيحبّها؛ زي الموز أو الفراولة أو الجوافة أو المانجو، وممكن تضيفي معاهم آيس كريم، وبكده طفلك هيوصل لجسمه كل فوايد اللبن.

آيس كريم بيتي مغذي
فكرة تانية ممكن تعمليها بعصير اللبن والفاكهة، وهي إنك تقدّميه لطفلك على شكل آيس كريم بيتي ومغذي؛ بإنك توزّعي العصير في قوالب الجيلي، وبعد كده اغرسي في كل قالب عصاية خشب (ستيك)، وحطّيها في الفريزر لغاية ما العصير يتجمّد وبعد كده طلّعي القوالب من الفريزر، وطلّعي الآيس كريم بالعصيان الخشبية وقدّميه لطفلك زي الآيس كريم الجاهز، ولكن بقيمة غذائية عالية، وخالي من المواد الحافظة والألوان الصناعية، وأكيد طفلك هيحبه جدا.

آيس كريم مغذي من صنع إيديكي

اللبن جزء من الأكل
حاولي تعملي أصناف الأكل والحلويات اللي بيكون اللبن جزء رئيسي من مكوناتها، زي الأرز باللبن، والمهلبية، والعاشورة، والكاسترد، والبودينج بنكهاته المختلفة، والكورن فليكس والزبادي، كل دي أشكال مختلفة لأكلات ممكن طفلك يكون بيحبها وفي نفس الوقت هتمدّ جسمه بنفس فوايد اللبن.

ودي طريقة عمل الأرز باللبن:

المقادير:
4 كوب لبن
½ كوب أرز
5 ملعقة كبيرة سكر
ملعقة كبيرة ماء ورد
كوب ماء

الأرز باللبن أكلة هتدي لأطفالك نفس فوائد اللبن

الطريقة:
1- اغسلي الأرز كويس، وبعد كده حطّيه في حلة على النار مع الميه، وسيبيهم مع بعض على النار لمدة 10 دقايق مع التقليب لغاية ما يبقى الأرز طري.

2- بعد كده ضيفي اللبن والسكر، وقلّبيهم مع بعض، وغطّي الحلة وسيبيها على النار لمدة 25 : 30 دقيقة أو لغاية ما الأرز يستوي تماما مع تقليبه من وقت للتاني.

3- في الآخر ضيفي ماء الورد على الأرز وارفعي الحلة من على النار، وابدئي وزّعي الأرز باللبن في أطباق التقديم، وسيبيها تبرد شوية، وبعدين حطّي الأطباق في الثلاجة علشان الأرز باللبن يتماسك، وعند التقديم طلّعي الأطباق وزيّنيها بالقرفة وقدّميها.. وبالهنا والشفا.

وفي النهاية مش لازم تنسي إن أكتر حاجة بتجذب انتباه الطفل هي الألوان الزاهية والمبهجة، علشان كده اهتمي دايما إنك تقدّمي له الأكل في أطباق وأكواب شكلها حلو وجذاب، ويكون عليها رسومات لشخصيات كرتونية مثلا طفلك بيحبها.

استنونا مع وصفات ونصائح جديدة كل يوم..

سلام،،،

في العيد.. اعملي أحلى المخللات

لو عايزة تجهزي نفسك للعيد، وتكوني متميّزة وتقدّمي أحلى أكلات وأحلى سفرة، على "ست بيت" هنساعدك علشان تكوني دايما مستعدّة..

والنهارده هنعرّف كل ست بيت إزاي تعمل أحلى وأسرع المخللات؛ علشان تكون جاهزة على العيد، تابعونا....

*******************

باذنجان مخلل

باذنجان مخلل
المقادير:¼ كيلو باذنجان عروس
10 فصوص ثوم
3 ليمون
ملعقة كبيرة كمون
10 حبات فلفل حامي
½ كوب بقدونس
3 ملاعق كبيرة ملح
¼ كوب خل
¼ كوب عصير ليمون

الطريقة:
1- أول حاجة اعملي فتحة بطول الباذنجان، وبعدين اقليه في الزيت.

2- قطّعي الفلفل والليمون، وضيفي عليهم الثوم والبقدونس والملح والفلفل والكمون والخل وعصير الليمون، واضربيهم في الخلاط لحد ما يبقى ناعم.

3- بعد ما تطلعي الباذنجان وتصفّيه من الزيت احشيه بالحشو اللي عندك، ورصّيه في علبة، وممكن تحتفظي به في التلاجة لعدة أيام.

*******************

خيار مخلل

خيار مخلل
المقادير:
كيلو خيار صغير
¼ كوب ملح
3 كوب ماء
2 عود كرفس
فلفل حامي
1 ½ كوب خل
2 عود قرفة
5 حبات قرنفل
10 حبات فلفل أسود صحيح
2 ملعقة كبيرة ثوم مفروم

الطريقة:
1- اغسلي الخيار ورصّيه في برطمان، لو الخيار كبير ممكن تقطّعيه شرايح بالطول، وبعد ما ترصّيه ضيفي عليه الثوم المفروم.

2- دوّبي الملح في الميه، وحطيه على نار متوسطة، وضيفي عليه الخل والقرفة والقرنفل والفلفل الأسود، وسيبيه لحد ما يبدأ في الغليان.

3- بعد كده ارفعيه من النار وسيبيه لحد ما يبرد، وبعدين صبّيه على الخيار لحد ما يغطيه تماما، وضيفي عليه الخل والفلفل والكرفس، واقفلي البرطمان كويس أوي.

4- سيبي الخيار لمدة يومين لحد ما يتشرّب الطعم، وبعد ما تبدئي تستخدميه لازم تحفظيه في التلاجة.. وبالهنا والشفا.

*******************

فلفل حامي مخلل

فلفل حامي مخلل
المقادير:
كيلو فلفل حامي
½ كيلو ليمون
3 ملاعق كبيرة ملح
½ كوب زيت زيتون

الطريقة:
1- اغسلي الفلفل وقطّعيه قطع متوسطة.

2- قشّري الليمون وقطّعيه قطع صغيرة جدا، وبعدين اخلطيه مع الفلفل، وحطّي عليه الملح وسيبيه لمدة نصف ساعة.

3- حطّي الخليط في برطمان زجاج وعليه زيت الزيتون وغطّيه كويس، وسيبيه لمدة أسبوع، وبعدين تستخدميه.. بالهنا والشفا.

*******************

ليمون مخلل

ليمون مخلل
المقادير:
كيلو ليمون
5 كوب ميه
8 ملعقة كبيرة ملح
3 ملعقة كبيرة حبة البركة
3 ملعقة كبيرة عصفر

الطريقة:
1- أول حاجة اغسلي الليمون كويس، وبعدين اسلقيه في كمية ميه بحيث تكون مغطية الليمون، وبعد ما يتسلق ارفعيه من النار وصفّيه من الميه.

2- بعد كده انقعيه في ميه باردة لمدة يومين، مع الحرص إنك تغيّري الميه دي من وقت للتاني؛ وده علشان تشيلي مرارة الليمون.

3- بعد اليومين دول اعملي الحشو بإنك تخلطي العصفر وحبة البركة و 3 ملاعق من الملح، وبعدين اعملي فتحة في كل ليمون على شكل "زائد"، واحشيها بالحشو اللي حضّرتيه ورصيه في برطمان.

4- بعد كده اخلطي 5 أكواب ميه مع 5 ملاعق ملح، وصبّيهم على الليمون؛ بحيث تغطي الكمية كلها، وبعدين حطّي طبقة من الزيت على الوش علشان تحفظه، واقفلي البرطمان كويس لمدة 3 أيام، وبعد كده تقدري تستخدميه.. بالهنا والشفا.

*******************

لفت مخلل

لفت مخلل
المقادير:
كيلو لفت صغير
7 كوب ميه
10 ملاعق كبيرة خل
½ كوب خل أبيض
حبة بنجر متوسطة

الطريقة:
1- قطّعي اللفت شرايح أو أرباع واغسليه كويس، وبعدين رشّي عليه 3 ملاعق ملح، وسيبيه في مصفاة لحد ما ينزّل ميته.

2- اشطفيه من الملح ورصّيه في برطمان، وقطّعي البنجر شرايح ورصيه معاه، وبعدين دوّبي الملح في ميه وخل، وصبيه فوق اللفت لحد ما يغطيه.

3- اقفلي البرطمان كويس أوي، وسيبيه لمدة أسبوع قبل ما تبدئي تستخدميه، وبعد ما تفتحيه احتفظي به في التلاجة.. وبالهنا والشفا.

ملحوظة: ممكن تزوّدي كمية البنجر على حسب درجة اللون اللي عايزاها للفت.

بالصور 5 أفكار جديدة لاستخدام كراكيب المنزل

أكياس للخداديات من القمصان القديمة

علبة خياطة من كرتونة البيض

لوحة للملاحظات والرسائل من لوح فلين قديم

حامل شمع من الكاسات القديمة

الأطباق القديمة في زينة الحوائط

الكراكيب هي مشكلة كل البيوت، بعضها لا يمكننا التخلّص منه لأنه يحمل ذكرى عزيزة على قلوبنا، والبعض الآخر نتركه لأنه من الممكن أن يتم استخدامه بشكل آخر، ولكننا قد لا نملك أفكارا لإعادة استغلاله..

في هذا المقال نقترح عليكِ مجموعة من الأفكار لاستغلال كراكيب البيت القديمة بشكل جمالي ومبتكر..

1- حامل شمع من الكاسات القديمة
لو عندك كاسات والقاعدة أو الحامل بتاعها مكسور، ممكن تحطيّه مقلوب على شمعة صغيرة، ومن فوق ممكن تحطّي تمثال صغير، وممكن بالطريقة دي تستخدمي مجموعة من الكاسات المختلفة في تزيين رف المطبخ أو مائدة الطعام أو حتى رف في الحمام.

2- أكياس للخداديات من القمصان القديمة
قصّي القمصان أو البلوزات القديمة بشكل مناسب؛ بحيث إنك تصنعي منها أكياس لخداديات غرفة المعيشة أو غرفة النوم.

3- لوحة للملاحظات والرسائل من لوح فلين قديم
لو عندك لوح فلين قديم زي اللي بيكونوا في علب الأجهزة الكهربائية، غلفيه بقطعة قماش ألوانها مبهجة، أو حتى جمّعي قصاصات أقمشة مختلفة علشان تديكي شكل مبتكر ومميز للوح، وعلّقيه في المطبخ أو في غرفة المعيشة أو في غرفة الأطفال، وهيكون مناسب إنك تعلّقي عليه أي ملاحظات مش عايزة تنسيها أو حتى أرقام التليفونات، أو بعض وصفات الأكل.

4- علبة خياطة من كرتونة البيض
كرتونة البيض ممكن تعملي منها علبة لأدوات الخياطة، وممكن تعملي لها بطانة قماش من بره علشان يكون شكلها أجمل، وممكن تعملي لها جيب قماش من جوه علشان تحطي فيه الإبر والدبابيس والمقصات.

5- الأطباق القديمة في زينة الحوائط
ممكن تستخدمي الأطباق القديمة المميزة بتعليقها على الحوائط لتزيينها، ممكن تعلقيها في المطبخ أو في غرفة الطعام أو في مدخل البيت.

أسوأ 6 جُمل ممكن تقوليها لطفلك

في أوقات كثيرة يكون على الأم إنجاز أكثر من مهمة في وقت واحد؛ مثل أن تكون في المطبخ تعدّ الطعام، وتنهي بعض الأوراق الخاصة بعمل ما، أو حتى تقوم بطبخ أكثر من شيء في الوقت نفسه مع ترتيب البيت، أو تريد التركيز في قراءة كتاب أو مقال، أو تناقش موضوعا ما مع إحدى صديقاتها، في الوقت نفسه يأتي أطفالها بطلبات كثيرة وتساؤلات أكثر.

في مثل هذه اللحظات كثيرا ما يكون انفعال الأم سببا في أن تقول كلاما لا يجب أبدا أن تردّ به على طفلها؛ لأنها عادة ما تكون ردودا لها تأثير نفسي سلبي كبير على الطفل أكبر مما تتصور الأم، ومن هذه الجمل والردود التي يجب ألا تقولها الأم لطفلها: 

لا تصرخي في وجه طفلك عندما تكونين مشغولة

1- "سيبني لوحدي"
في مرات كثيرة عندما تكون الأم مشغولة بعمل ما؛ تصرخ في أطفالها "سيبوني لوحدي.."، "مش عايزة أسمع صوت.." ، "ماحدش يقاطعني.."، "أنا مشغولة دلوقتي..".

على الرغم من أنه يبدو كلاما بسيطا ومكررا تعيده كل الأمهات على مسامع أطفالهن؛ فإنه في الحقيقة يترك عند الأطفال منذ الصغر فكرة وإحساسا أنه من غير المناسب أن يتحدّث إلى أمه، أو أنها لا تريد أن تسمعه وليست مهتمة بما يريد أن يقوله.

من حق كل أم أن تحصل على بعض الوقت لنفسها، والأفضل بدلا من أن تصرخ في أطفالها لتبعدهم؛ أن تعلمهم احترام وقتها الخاص، وأن تتكلم معهم بشكل صادق وواقعي، وتتأكّد أن الأطفال مهما صغر عمرهم يفهمون ما نقوله وما لا نقوله.

أن تقولي للطفل مثلا "ماما هتقعد تقرا في الكتاب ده نص ساعة، وأنت هتلون في الكراسة دي"، ويفضّل أن تعديه بمكافأة أو نشاط مشترك يحفزه على الالتزام؛ مثل: "لما أخلص هنلعب سوا " أو "لما أخلص هنخرج نتفسح".

عززي لدى طفلك ثقته بنفسه

2- "يا غبي/ يا غبية"
ما لا تعرفه الأمهات غالبا هو أن الأطفال يصدقون عن أنفسهم ما يقوله آباؤهم وأمهاتهم عنهم؛ الطفل الذي تنادينه "يا غبي" أو "يا كسلان" أو "يا كذاب"، أو تصفينه لأصدقائك بأنه خجول أو مهمل أو ضعيف، عادة ما يصدق ما تقولينه عنه، وعادة ما يميل لتكوين صورته عن نفسه من خلال رأي والديه فيه.

احرصي على أن تعززي لدى طفلك ثقته بنفسه وحبه لصفاته بذكر إيجابياته، وتفادي وصفه بالصفات والعادات السيئة سواء كنتم بمفردكم أو أمام الناس.

عندما يخطئ طفلك؛ تحدثي معه دائما عن السلوك الخاطئ، وفي ذهنك دائما أنه "مش وِحِش"؛ لأنه فعل كذا أو قال كذا؛ ولكن السلوك المعني "وحش".

مثلا يفضّل أن تقولي له في موقف ما "الكدب وحش أو غلط" بدلا من أن تقولي له "أنت كداب"، أو أن تقولي له "خلّي بالك المرة الجاية علشان ما تكسرش الكوباية" بدلا من أن تقولي له "أنت وحش إنك كسرت الكوباية".

علّمي طفلك اكتشاف مشاعره بدلا من توبيخه

3- "بلاش عياط"
في مواقف كثيرة تقول الأم لطفلها "ما تعيطش"، "ما تخافش من كذا"، "ما تبقاش عيل جبان"، "الرجالة ما تعيطش"...

الأطفال حتى الذين تعلموا الكلام، لغتهم ضعيفة وغير قادرة على التعبير عمّا يشعروه؛ فيلجأ الأطفال للبكاء للتعبير عن الغضب أو الحزن أو الاحتياج للأمان أو المساندة أو الاهتمام، وهذه هي الطريقة الوحيدة التي يمتلكونها للتعبير.

وبالتالي فإن منعك للطفل من البكاء؛ هو في الحقيقة منعه من التعبير عن مشاعره، وبعكس ما تظن الأمهات؛ فذلك لا يساعده على أن يكون أقوى أو أشجع أو أكبر، ولكنه يجعله يكبت مشاعره أو يتجاهلها؛ لأن التعبير عنها مرفوض عند أقرب الناس له.

بدلا من ذلك علّمي طفلك اكتشاف مشاعره الحقيقية في المواقف المختلفة؛ عندما يقع فيبدأ في البكاء لا تطلبي منه أن يتوقف، وبدلا من ذلك اسأليه بهدوء: "أنت بتعيط ليه؟"، أو "أنت حاسس بإيه؟" أو "إيه اللي مضايقك؟"، وساعديه في وصف ما يشعر به تماما، وعرّفي له اسم شعوره والطريقة المناسبة للتعبير عن هذه المشاعر.

اجعلي طفلك يشعر أنه متميز ولا تقارنيه بأحد

4- "أنت ليه مش زي فلان؟"
من جمل الأمهات الشهيرة: "شوف أختك شاطرة إزاي؟"، أو "شوفي بنت خالتك بتسمع كلام مامتها وإنتي لأ"، أو "ماتعرفش تبقى شاطر وذكي كده زي صاحبك".

كل هذه الجمل وما يشابهها لا يساعد الطفل ولا يشجعه بأي شكل من الأشكال؛ ولكنه بدلا من ذلك يقلل من ثقة الطفل بنفسه وشعوره بتميزه واختلافه.

كل طفل له مهارات مختلفة وشخصية خاصة.. نعم للطفل شخصية خاصة، لا يجب أن تطلبي منه أن يكون مثل فلان، أو أن يتعلم ما تعلمه أخوه بنفس السرعة، أو أن يكون أذكى أو أسرع.

يجب فقط أن تكتشفي مهارات طفلك وقدارته، وتساعديه وتشجعيه لتطوير نفسه، ولتحقيق ذاته، وللوصول لإنجازات في الأشياء التي يحبها ويريد أن ينجح فيها.

لا يجب أبدا أن تطالبي كل أطفالك بتعلم السباحة مثلا، ربما يكون أحد أطفالك بارعا في السباحة، والآخر لديه موهبة في الموسيقى، والثالث يفضل القراءة والكتابة؛ امنحي كل طفل مساحته الخاصة، واجعليه يشعر أنه متميز وقادر وموهوب، ولا تقارنيه بأحد لأنه ليس أحد، هو نفسه فقط.

توقفي عن إصدار التهديدات والوعيد طوال الوقت

5- "كده غلط.. كده غلط.. كده غلط"
القاعدة التي تقول إن "تربية الطفل تعني منعه من الخطأ"؛ هي قاعدة تربوية خاطئة تماما، فتعلم الأطفال والكبار يعتمد على التجربة والخطأ طوال الوقت.

امنحي طفلك مساحة من الخطأ دون أن تعرّضي حياته للخطر، وتوقفي عن إصدار التهديدات والوعيد والإنذارات طوال الوقت؛ فهي لا تقوّم سلوك الطفل بقدر ما تملأه بحالة متواصلة ومستمرة من الخوف والرغبة في تكرار الخطأ؛ لأن الممنوع دائما مرغوب.

شجّعي طفلك على الأفعال الصحيحة بدلا من نهيه طوال الوقت عن الأفعال الخاطئة، ساعديه على الرسم وعزف الموسيقى وترتيب المنزل، ومساعدتك في المطبخ، واكتشاف هواياته الخاصة، واتفقي معه على مكافآت لما ينجزه من مهام أو يتقنه من أعمال؛ بدلا من أن تعاقبيه بالحرمان أو الضرب أو الغضب على قائمة طويلة من الأفعال الممنوعة.

قولي له: "لو خلصت الواجب بدري هنخرج سوا" بدلا من "لو ماخلصتش الواجب بدري هتتحرم من التليفزيون"، أو قولي له "لو رتبت سريرك لوحدك هنجيب آيس كريم"، بدلا من أن تقولي: "لو مارتبتش سريرك هاحرمك من المصروف".

لا تهدّدي طفلك بسلطة الأب حتى لا يفقد حبه له

6- "هاقول لأبوك لما يرجع"
من أشهر الأكليشيهات التي تستخدمها معظم الأمهات جملة "هاقول لبابا لما يرجع". التهديد الشهير الذي تلجأ إليه الأمهات عندما يفقدن الحيل مع الأطفال، ويضطررن لتهديدهم بسلطة أكبر وأعلى وغائبة.

في مثل هذه المواقف يحدث سيناريو من اثنين وكلاهما أسوأ من الآخر:
الأول: أن يعود الأب ويكون قد مرّ وقت طويل على السلوك الخاطئ الذي هددت الأم بخصوصه، فتنسى إخبار الأب؛ وفي هذه الحالة عادة ما تفقد الأم مصداقيتها عند أطفالها، وعندما تكرر تهديدهم سواء نفس التهديد أو غيره يقول لسان حالهم: "هي بتقول كده بس مش هتعمل حاجة.."، فلا يصدقونها سواء هدّدتهم بعقاب أو وعدتهم بمكافأة، ويصبح تقويم سلوكهم أصعب كثيرا على الأم في هذه الحالة.

الثاني: أن تقوم الأم بإخبار الأب بما فعله الطفل، فيقوم الأب بمعاقبة الطفل عقابا أكبر كثيرا مما يستحقه الموقف، ويكون ذلك إثباتا لهيبة الأب واحترامه، وكما لو كان تعزيزا لفكرة "إن فيه كبير يخاف منه الطفل".

في هذه الحالة عادة ما يعمم خوف الطفل من والده، ويصبح كونه سلطة عليا ترهبه سببا في ابتعاده عنه، وفي تولّد مشاعر خوف دائمة من الخطأ خوفا من العقاب، وليس تعلما للصواب أو حبا فيه.

بسكويت بزبدة الفول السوداني: 3 طرق مختلفة

وصفات سهلة وسريعة التحضير لبسكويت بزبدة الفول السوداني

بسكويت سادة بزبدة الفول السوداني

المقادير

كوب سكر بني معلب

كوب سكر أبيض

كوب زبدة فول سوداني

كوب سمن

ملعقة صغيرة بيكربونات صوديوم

ملعقتان كبيرتان مياه ساخنة

كوبان ونصف دقيق يصلح لجميع الأغراض

بيضتان

الطريقة:

1- امزجي السكر الأبيض والسكر البني معا.

2- أضيفي زبدة الفول السوداني والسمن إلى مزيج السكر.

3- أضيفي بيكربونات الصوديوم إلى المياه الساخنة.

4- أضيفي المياه إلى الخليط السابق وقلبي جيدا.

5- أضيفي البيضتين في منتصف المزيج، ثم الدقيق وقلبيه جيدا إلى أن تشكلي عجينا.

6- قسمي العجين إلى كرات صغيرة، وضعيها على ورق زبدة غير مدهون بأي مادة دهنية.

7- بشوكة مبللة قليلا بالمياه ، اضغطي على سطح الكرات مرة طوليا وأخرى عرضيا.

8- اخبزي البسكويت في الفرن على درجة حرارة 350 إلى 375 فهرنهايت ( ما يعادل 175 إلى 190 سينتيجريد ) لمدة من 8 إلى 10 دقائق.

ملحوظة: إذا أردت الحصول على بسكويت مقرمش، تخلي عن البيضتين ونفذي الوصفة بنفس الطريقة السابقة.

بسكويت زبدة الفول السوداني بالشكولاتة

المقادير:

كوب ألواح شكولاتة نصف محلاة

نصف كوب زبد مخفوقة

نصف كوب زبدة فول سوداني كريمة

نصف كوب سكر بني معلب

ربع كوب سكر أبيض

بيضة

ملعقة كبيرة لبن

ملعقة صغيرة فانيليا

كوب دقيق غير منخول

نصف ملعقة صغيرة بيكينج باودر

نصف ملعقة صغيرة ملح (الملح ضروري لإخراج نكهة الفانيليا)

ثلاثة أرباع كوب فول سوداني غير مملح محمص ثم مبشور

الطريقة:

1- سخني الفرن قبل البدء في تحضير الوصفة على درجة حرارة 350 فهرنهايت (اي ما يعادل 175 درجة سينتيجريد).

2- أحضري قدرا كبيرا، وضعي به الزبد وزبدة الفول السوداني وأخفقي جيدا حتى تشكلي كريمة.

3- أضيفي السكر البني والسكر الأبيض وقلبي جيدا إلى أن تمتزج المكونات تماما.

4- أضيفي البيض واللبن والفانيليا وقلبي المكونات باستخدام المضرب الكهربائي.

5- في إناء آخر، امزجي الدقيق والبيكينج باودر والملح.

6- ابدئي في إضافة مزيج المكونات الجافة إلى الكريمة بالتدريج.

7- بعد المزج جيدا، ضعي الشكولاتة بعد تكسيرها إلى قطع صغيرة والفول السوداني المبشور وقلبي حتى يمتزجا مع العجين.

8- ضعي العجين في البراد لمدة لا تقل عن ربع ساعة.

9- باستخدام ملعقة كبيرة، شكلي كرات صغيرة من العجين، وضعيها في صينية بسكويت غير مدهونة بالزبد.

10- اخبزي البسكويت في الفرن لمدة من 12 إلى 14 دقيقة، او حتى تكتسب حواف البسكويت اللون الذهبي.

11- بعد الخبز ضعي البسكويتات على ورقة زبدة لمدة دقيقة حتى تهدأ، ثم انقليها على شبكة المخبوزات.

12- ملحوظة: لتخزين البسكويت، ضعيه في علبة محكمة الغلق حتى لا يكتسب رطوبة ويتغير مذاقه وقوامه.

بسكويت زبدة الفول السوداني بالشوفان

المقادير:

ثلاثة أرباع كوب دقيق

نصف ملعقة صغيرة بيكربونات صوديوم

ربع ملعقة صغيرة بيكينج باودر

نصف ملعقة صغيرة ملح

نصف كوب زبد مخفوق

نصف كوب زبد فول سوداني

نصف كوب سكر أبيض

نصف كوب سكر بني

بيضة

ملعقة صغيرة مستخلص الفانيليا

كوب شوفان سريع الطهي

3 ملاعق كبيرة زبد مخفوق

كوب سكر حلويات

نصف كوب زبد فول سوداني ناعمة

ملعقتان ونصف كبيرتان كريمة خفق

الطريقة:

1- في إناء كبير، امزجي معا نصف كوب زبد ونصف كوب زبدة فول سوداني والسكر الأبيض والسكر البني والفانيليا.

2- أضيفي البيضة وأخفقي.

3- في إناء آخر، امزجي الدقيق والبيكربونات والبيكينج باودر والملح.

4- أضيفي المكونات الجافة إلى المزيج الكريمي وقلبي.

5- أضيفي الشوفان وقلبي جيدا.

6- شكلي كرات صغيرة بالملعقة، وضعيها في صينية الخبز، واضغطيها بشوكة لتشكل بسكويتات سمك الواحدة ربع بوصة تقريبا، واخبزيها على حرارة 175 سينتيجريد لمدة 10 دقائق.

7- اصنعي الحشو: أخفقي 3 ملاعق زبد مع سكر الحلويات( السكر المكرمل) ونصف كوب زبدة فول سوداني وكريمة الخفق.

8- رتبي نصف عدد البسكويتات في طبق تقديم وغطيها بالحشو ثم ضعي فوقها البسكويتات الباقية.