بالصور كباب حلة +أرز معمر+ ملوخية خطوة بخطوة

كباب الحلة اكلة سهلة وبسيطة

خصوصا للعرايس والمبتدئات

المكونات او المقادير

نص كيلو لحمة

بصل حلقات وبصل مبشور

توم متقطع

ملح وفلفل

شوربة

سمنة

شوفان

الطريقة

هنحط السمنة فى الطاسة او الحلة لغاية ماتقدح

وننزل عليها البصل الحلقات والمبشور

لغاية مالونه يصفر

وبعدها ننزل عليه التوم

ونحط عليهم اللحمة ونقلبهم فيه

طبعا اللحمة مش هتكون نية هتكون واخده قبلها نص سلقة

هنحط ملح وفلفل وبعدها نغطىها بشوربة اللحمة اللى اتسلقت فيها

نسيبها تستوى او تكمل سواها براحتنا

طبعا الشوربة اللى حطيناها دى هى الصوص

بس عشان نتخنه قدامنا 3 حاجات

ياتحطى كريمة طبخ

او تحطى كوباية ميه وفيها معلقتين دقيق متدوبين

ياتحطى شوفان زى مانا عملت

واى خطوة من دى هتكون قبل ماتطفى بربع ساعة

انا عملت معاه رز وسلطة خضرا

دلوقتى هسيبكم مع الصور بالتفصيل

الأرز المعمر
اول حاجة مكونات الرز المعمر
كوبايتين رز مغسولين ومنقوعين لمدة نصف ساعة
نص كيلو لحمة مسلوقة
مج ونص شوربة
2 مج لبن حليب
2 ملعقة كبيرة سمنة او زبدة
اول حاجة بالنسبة لسلق الحمة هنحطها فى حلة مع بصلتين وعليهم ملح وفلفل وورق لورى وقرنفل وحبهان ونغطيها ونسيبها تجيب ميتها
بعد ماتجيب ميتها هنقطع عدد 4 طماطم ونحطها عليها ونحط ميه ونسيبها تتسلق
واللحمة بتتسلق هنجيب الرز نغسله وننقعه
ونقع الرز ده خطوة مهمة جدا لأنه بيسهل سواه بعد كده
بعد مانقعناه نصفيه ونحط عليه السمنة

ونحط عليهم اللبن

ونحط عليهم الشوربة

ونحط فيه اللحمة اللى سلقناها بعد ماتكون استوت ونقلبهم
وندخله الفرن
انا دخلته الفرن على حرارة 200 اخد حوالى ساعة الا ربع
وتطفى لما يستوى وتلاقى الوش احمر
بس ممكن بعد مادخلتيه بنص ساعة تطلعيه وتلاقيه محتاج شوربة تزوديله
وده بعد ماطلع

نيجى بقى للملوخية
مكوناتها
نص كيلو ملوخية خضرا(احنا بنحب نعمل كمية قليلة عشان الملوخية لما بتبات مبتبقاش حلوة)
2 مج شوربة
للتقلية
4 فصوص توم مهروسين
م ص كسبرة ناشفة
نص م ص ملح
2 ملعقة متوسطة سمنة بلدى
معلش هشرح بالتفصيل عشان المبتدئات
هنجيب الملوخية وهنغسل الورق بعد مانقطفه

وهنخرطها بالمخرطة

هنجيب كمية الشوربة ونسيبهم يغلو فى الحلة

ولما يغلو هنحط عليهم الملوخية

ونقلبهم لغاية مايتجانسو

ونسيبهم يغلو مع بعض
هنجيب التوم المهروس والسمنة والكسبرة والملح ونحطهم فى طاسة

ونشغل عليها النار

واول ماتبقى لونها دهبى نطفى وننزلها على الملوخية بعد ماتغلى ونقلبهم
ونغرفهم

المصدر: http://fashion.azyya.com/320049.html