الأربعاء، 30 نوفمبر، 2011

إزاي تتخلصي من بقعة الزيت على الملابس؟!


في عالم المرأة الكثير والكثير من التفاصيل اللي ممكن تكون بسيطة وصغيرة، لكنها فعلا بتفرق واحدة عن التانية..

وفي صفحتنا دي هنقول لكِ دايما نصايح صغيرة ع الماشي تقدري بها تواجهي المشكلات اليومية البسيطة اللي ممكن تقابلك في حياتك..


علشان مع "ست بيت" تبقي دايما مختلفة ومتميّزة وشاطرة..

للتخلّص من بقعة الزيت على الملابس.. حطّي كمية من بودرة التلك بسرعة على مكان البقعة، وسيبيها طول الليل لغاية ما البودرة تمتص الزيت، وبعد كده نفضيها من البودرة واغسليها بطريقتك العادية.

 لتبييض الأسنان وتنظيفها من آثار الشاي والقهوة.. افركيها بثمرة فراولة مهروسة.

لتنظيف الأرضيات والأسطح عند سقوط الزيت عليها.. رشّي على مكان الزيت شوية بودرة تلك أو دقيق أو نشا، وسيبيه شوية لغاية ما البودرة تمتص الزيت، وبعد كده شيلي البودرة  بالمكنسة أو بفوطة جافة، وامسحي مكان الزيت بالميه.

علشان تدخلي الخيط في إبرة الخياطة بسهولة.. اغمسي طرف الخيط في مُلمع الأظافر بتاعك، وبكده هتلاقيه بقى ناشف وتقدري تُلضميه في الإبرة بسهولة.

للحفاظ على جواربك الخفيفة أطول وقت.. اشطفيها بالماء البارد وهي جديدة، وبعد كده حُطّيها في الثلاجة لمدة ساعة أو ساعتين، وبكده تعيش معاكِ لوقت أطول من غير ما تتقطع. 

لتنظيف فرش الماكياج.. انقعيها في خليط مكوّن من 3/ 4 كوب ميه، و1/ 4 كوب خل، وسيبيها لمدة ساعتين، وبعد كده اشطفيها ونشّفيها كويس.

لتنظيف الفرن من بواقي الطعام والدهون.. حُطّي إناء فيه كوب ميه مغلية، وولعي الفرن ودخّليه، وسيبي الميه تكمّل غليانها جوه الفرن لعدة دقائق؛ لأن البخار اللي بيطلع ده بيساعد في إذابة بقايا الطعام والدهون، وبعد كده امسحي الفرن بقطعة قماش مغموسة في الخل.

لو فيه نمل في البيت.. اخلطي خل التفاح مع قليل من الماء، ورشّيه في الأماكن اللي بيتجمع فيها النمل عندك في البيت.

للتخلّص من بُقع الحبر على الملابس..
 حُطّي على مكان البُقعة عصير ليمون أو خل، وافركيها كويس لغاية ما البُقعة تختفي، وبعد كده اغسليها بطريقتك العادية.

للتخلص من آثار احتراق الطعام في الأواني.. حُطّي شوية ميه في الإناء مع بصلة سليمة، وحُطّيهم على النار وسيبيهم يغلوا مع بعض، وبكده هتقدري تنظّفي آثار الاحتراق في الإناء بسهولة.

لمعرفة البيض الطازج من الفاسد.. حطّي البيض في الميه، لو لقيتي إنها سقطت في الميه بشكل أفقي، يبقى البيض ده طازج، ولو البيض سقط بشكل مائل، يبقى عمره من 3 : 4 أيام، ولو سقطت بشكل عمودي يبقى عمرها 10 أيام، أما بقى لو البيض طفى على سطح الميه يبقى فاسد.

لو الأكل اتحرق منك.. ارفعي الحلة من على النار، وحطّيها في حلة أكبر تكون فيها مية باردة؛ علشان تمنعي طعم وريحة الشياط من إنه يتنقل لباقي الأكل، وبعد كده انقلي الأكل السليم في حلة تانية وحطّيه على النار لغاية ما يستوي.

لتنظيف الفضيات.. ممكن تستخدمي الميه اللي سلقتي فيها البطاطا أو البطاطس بالقشرة بتاعتها، والطريقة دي بتساعدك في إزالة الطبقة السوداء اللي بتكون على الملاعق أو الشوك الفضة.

لو عايزة تعرفي البيكينج باودر مُنتهي الصلاحية ولّا لأ.. حطّي ملعقة منه في كوب ميه لو حصل فوران يبقى البيكينج بودر ده سليم، أما بقى لو ماحصلش تفاعل أو فوران يبقى مُنتهي الصلاحية.

لو بتعاني من عسر الهضم.. ضيفي ملعقة كبيرة من خل التفاح على نصف كوب من النعناع المنقوع في الماء، وتناوليه بعد الأكل على طول.

لو الجزمة ضيّقة عليكي.. ادعكي المنطقة اللي بتضغط على رجلك من جوه بالصابون المبشور.

لتنظيف المرايات.. استخدمي البنطلونات الجينز القديمة، وقصّيها على شكل فوط صغيرة؛ لأن الجينز بينضف المرايات، ومش بيترك وبر عليها زي الأقمشة التانية.

لترطيب البشرة.. اشربي كل يوم من لترين إلى ثلاثة لترات من الميه والأعشاب، والطريقة دي هي أفضل مرطب للبشرة، وكمان بتنقي الجسم من السموم.

للتخلّص من بقعة مستحضرات التجميل على الملابس..
 رشّي مكان البقعة قبل ما تغسليها بمنظف الزجاج، وبعد كده ادعكيها مكان البقعة بفرشة السجاد، ونشّفيها بفوطة صغيرة.

للتخلّص من رائحة الثوم..
 افركي إيدكي ببواقي البن اللي بتتبقى بعد ما تشربي فنجان القهوة، ولو بتعاني من رائحة الثوم في الفم امضغي بعض عيدان البقدونس.

اعملي أشهى المقبلات والسلطات على ست بيت



النهارده على "مجلة حواء ست بيت" هنقدّم لك وصفات خفيفة، ممكن تقدّميها كمقبلات قبل الطبق الرئيسي أو سلطات مع الأكل، جرّبيها وابعتي لنا رأيك فيها، وابعتي لنا لو عندك أي أطباق تانية عايزة تعرفي طريقتها..

بطاطس مهروسة مع الجبنة
المقادير:
كيلو بطاطس
كوب جبنة شيدر مبشورة
1/ 4 كوب لبن
1/ 4 كوب كريمة خفق (هتلاقيها في السوبر ماركت)
1/ 4 كوب زبدة
ملح وفلفل

الطريقة:
1- حطّي اللبن والزبدة والكريمة في حلة صغيرة على النار، وتبّليها بالملح والفلفل.

2- اسلقي البطاطس، وبعد ما تتسلق كويس اهرسيها مع الجبنة الشيدر، وقلّبيها كويس لحد ما الجبنة تسيح.

3- حطّي خليط اللبن والكريمة على البطاطس، وقلّبيها لحد ما يمتزجوا كويس، وزيّنيها بالبقدونس، وقدّميها.. بالهنا والشفا.

************************

سَلطة العدس
المقادير:
1/ 4 كيلو عدس أسود مسلوق
ملعقة صغيرة بهارات
فص ثوم مفروم
حزمة كزبرة مفرومة
عصير ليمونة
3 ملاعق كبيرة زيت زيتون
ملعقة كبيرة خل
ملح

الطريقة:
1- اخلطي كل المكونات مع بعض، وتبّليها بالملح وعصير الليمون والخل، وممكن تضيفي شرايح بصل على السلطة حسب ذوقك، وبعد كده قدّميها.. بالهنا والشفا.

خلصت وصفاتنا النهارده..
استنونا كل يوم مع وصفات جديدة..
سلام،،،

مشروبات شتوية مفتكسة على....ست بيت



... لكم أفكار ووصفات مفتكسة جدا لمشروبات شتوية دافئة، وكمان هتناسب جدا الناس اللي بتعمل دايت، تابعونا.

************************

شاي بالزنجبيل والقرفة وعصير الرمان 
المقادير:
7 أكواب ميه
كوب سكر
قطعة صغيرة زنجبيل
3 حبات قرنفل
قطعة قرفة خشب
4 أكياس شاي
كوب عصير رمان
1/ 4 كوب عصير ليمون

الطريقة:
1- اخلطي الميه والسكر والزنجبيل والقرنفل والقرفة مع بعض، وحُطّيهم على النار لحد ما الخليط يغلي والسكر يدوب.

2- بعد كده ارفعي الخليط من النار وصفّيه، وبعدين حُطّي أكياس الشاي وسيبيها تتنقع لمدة 10 دقائق وارفعيها من الخليط، وحُطّي فيه عصير الليمون وعصير الرمان وقلبيهم مع الخليط.

3- رجعي الخليط تاني على النار وسخنيه، وبعدين صبيه في الأكواب، وممكن تحطّي فيه شرايح ليمون، وقدميه.. بالهنا والشفا.

************************

شاي بالليمون والزنجبيل
المقادير:
6 أكواب ميه
4 ملاعق صغيرة سكر
قطعة صغيرة زنجبيل
بشر 8 ليمونات
6 أكياس شاي أخضر

الطريقة:
1- اخلطي الميه والسكر والزنجبيل وبشر الليمون، وحُطّي الخليط على النار، وسيبيه لحد ما يغلي.

2- قلّلي الحرارة، وسيبي الخليط على النار لمدة 10 دقائق، وبعدين ارفعي الزنجبيل وبشر الليمون من الخليط، وحطّي أكياس الشاي وغطّي الحلة، وسيبيه يتنقع في الخليط لمدة 10 دقائق.

3- ارفعي أكياس الشاي، وصبّي الخليط في الأكواب وزينيها بشرايح الليمون، وقدميها.. بالهنا والشفا.

************************

موكا بالبرتقال
المقادير:
1/ 3 كوب عصير برتقال
قشر برتقالة تقطع شرايح رفيعة
7 حبات قرنفل
2 كوب ميه
2 كوب لبن
1/ 2 كوب سكر بني
1/ 4 كوب كاكاو
2 ملعقة كبيرة نسكافيه
2 عود قرفة

الطريقة:
1- حطّي بشر الليمون والقرفة والقرنفل في قطعة شاش واربطيها، وبعدين حطّيهم في حلة صغيرة مع الميه واللبن والسكر وعصير البرتقال والنسكافيه والكاكاو، وسيبي الخليط على النار لحد ما يغلي.

2- ارفعي الخليط من على النار، وارفعي منه قطعة الشاش، وسيبيه لمدة 10 دقائق، وبعدين قدميه.. بالهنا والشفا.

************************

تفاح بالقرفة
المقادير:
8 أكواب عصير تفاح
1/ 4 كوب سكر بني
2 عود قرفة
ملعقة صغيرة قرنفل
قشر برتقال تقطع شرايح

الطريقة:
1- اخلطي عصير التفاح والسكر البني في حلة صغيرة على النار، وقلبيهم لحد ما السكر يدوب.

2- حطّي القرفة والقرنفل وقشر البرتقال في قطعة شاش واربطيها، وبعدين حطّيها مع الخليط، وسيبيه على نار هادية لمدة 15 دقيقة، وبعد كده ارفعي قطعة الشاش، وصبيه في الأكواب، وقدميه.. بالهنا والشفا.

************************

شيكولاتة ساخنة على الطريقة المكسيكية
المقادير:
3/ 4 كوب شيكولاتة خام مبشورة
4 أكواب لبن
2 كوب آيس كريم فانيليا
3/ 4 كوب سكر
1 1/ 2 كوب ميه
1 1/ 2 ملعقة صغيرة قرفة
رشة فانيليا

الطريقة:
1- حطّي اللبن والسكر والآيس كريم في حلة صغيرة على نار هادية؛ لحد ما الخليط يسخن، وماتخليهوش يغلي.

2- بعدين حطّي عليه الشيكولاتة المبشورة والقرفة والفانيليا والميه، وسيبي الخليط على النار لحد ما يسخن، وبعدين صبّيه في الأكواب وقدميه مع صوص كراميل.. بالهنا والشفا.

************************

شيكولاتة ساخنة مع البنجر الأحمر
المقادير:
حبة بنجر
2 كوب لبن
2 : 4 ملعقة كبيرة كاكاو
2 : 4 ملعقة كبيرة عسل

الطريقة:
1- قشري البنجر وقطعيه شرايح وحطّيه مع اللبن على النار لحد ما يسخن، ولونه يبقى أحمر فاتح، وبعدين ارفعي شرايح البنجر.

2- اخلطي الكاكاو مع العسل في طبق، وقلبيهم لحد ما يعملوا زي عجينة سميكة، وبعدين قلبي الخليط ده مع اللبن، وصبّيه في الأكواب، وقدميه.. بالهنا والشفا.

خلصت وصفاتنا النهارده..

Related Posts Plugin for WordPress, Blogger...

http://setbeet.blogspot.com/

 

مجلة حواء..ست بيت Copyright © 2009 LKart Theme is Designed by Lasantha